2021-12-07 23:33:21
琴晚，炒螺明明哥又被畀人爆咗个爆粗闹人嘅视频，喺宵夜档饮大两杯，醉酒闹人，问候人哋娘亲一分几钟。
而人哋一恶起身，佢即刻肴底，冇晒声出。
【想睇完整视频嘅自己友，后台回复关键词“炒螺”】
炒螺明系广州宵夜档传奇人物，好多广州人都多多少少听过佢个名。
金色卷发、花衬衫、一部单车、一煲田螺，加上风骚表演，就系炒螺明嘅标签。
80年代开始炒螺明就喺沿江路一带大排档卖炒螺，由于生意唔好做，佢就开始着女装，模仿偶像梅艳芳唱歌嚟卖螺，喺广州宵夜界崭露头角。
而令炒螺明真正出名，系佢将流行曲改编为咸水歌、粗口歌，歌词露骨粗俗，加上搔首弄姿嘅表演，听过嘅人冇一个唔笑到肚疼，从此一发不可收拾，吸引咗一堆忠实粉丝。
炒螺明由此打出名堂，成为广州草根名人。2009年首开个人演唱会，喺南方剧院登台演出，成班粉丝都去捧场。
2010年参加《叮王争霸》，最后攞咗亚军。
炒螺明仲上过香港电视，连詹瑞文都特登过嚟搵佢买螺，睇佢表演。
不过，与热情嘅粉丝相反，炒螺明嘅屋企人亲戚都觉得佢嘅行为好羞家，老婆离开咗佢，个女一直都唔认佢。
呢几年，炒螺明沉寂咗，时不时都仲有见到佢上新闻，有时有人话佢遇意外死亡，有时系佢饮醉酒惹事生非，从呢啲新闻，起码我哋仲知道呢个广州宵夜传说依然活跃喺广州城内。
除咗炒螺明，广州草根名人又点会少啊！
区伯
区伯原名区少坤，以前喺海珠区做农贸市场管理员，屋企环境唔算好，靠低保度日。
2006年开始，区伯多次喺街上拍照，以“广州区伯”嘅身份喺新浪微博上曝光涉嫌私用嘅公车，向有关部门举报。
区伯前后曝光咗100几部公车遭到私用，得到市民同媒体嘅广泛关注，很快成个广州都知道佢。
区伯不畏强权，以年迈之躯监督公权，令到好多粉丝视佢为广州草根英雄。
区伯非常关心时事民生，经常对民生决策同时事发表个人睇法，区伯炮轰过广州水价上涨方案，到环保局申请调查污染事件，到南方报业门口声援过南周事件等。
区伯名声大噪，负面消息都接踵而来，比如有人爆料佢呃低保，后生时候品行不正被劳改，煽动粉丝大闹民政部门等。
李瑞然（1922-2012）
广州扫街元祖，草根摄影师。李瑞然原来系一名教师，从上世纪90年代开始，每日攞住部相机穿梭广州嘅大街小巷，拍摄广州大小角落，记录住广州近二十年嘅变迁。
李瑞然一生有二十几年时间都喺度同推土机钩机赛跑，用咗1300几卷胶卷，拍摄咗超过五万张珍贵相片，后来相片收归广州档案馆，成为珍贵史料。
我哋之前曾经介绍过李瑞然，喺呢度就唔再赘述，各位自己友可以点击回顾——感谢你，为我哋留住咗曾经嘅广州
何文辉
讲何文辉，你未必知道佢系乜水，如果我讲“酱爆”，你就马上反应过嚟，《少林足球》入边阿个“从未放弃做个伟大作曲家”嘅配角。
周星驰电影出色嘅唔止主角，通常就算一个小小嘅配角都令人印象深刻，何文辉就系其中一个。
何文辉出生于广州一个普通家庭，一开始梦想系音乐，后来2000年报名参加《少林足球》选秀，从此踏上演艺道路。
《少林足球》、《功夫》、《西游·降魔篇》入边都有何文辉嘅身影，其中以酱爆同畀包租婆打嘅飞发铺伙计最为出彩，令佢一炮而红，开始出演电视剧同拍广告。
由于出身于岭南普通家庭，又冇受过专业训练，所以何文辉身上自带岭南小市民嘅草根气质，演社会底层人物完全冇问题。
连周星驰都称赞何文辉敬业又放得开，《功夫》入边露半个屁股就系何文辉自己主动提出，而且第一次拍戏，毫无表演经验嘅何文辉反而做到一take过。
草根变成明星，何文辉亦都算系广州嘅一个传奇。
上边嘅草根名人，佢哋身上可能存在争议，亦都褒贬不一。
所谓嘅草根名人，其实就系一啲不平凡嘅平凡人，凡人身上有亮光点，自然都会有灰暗面，大家冇必要因为光环效应而极力追捧一个人，或者因为负面评论而刻意抹杀一个人。
钟意咪畀啲掌声，唔钟意就行开就算，做人正面啲！
素材出自百度百科、搜狐新闻等
羊城网负责整理编辑
記憶中嘅年味：飲啖茶，食件糕……
花尾渡賀年新品，純手工製作廣式糕點。經典蘿蔔糕、黃金馬蹄糕、牛奶紅豆糕、香濃芋頭糕，多種口味任君選擇！錫紙禮盒裝，食用更加安全，送禮體面過人！
零售價：￥48文/盒
點擊底部【閱讀原文】或掃描二維碼即可掃貨
淘寶購買請搜索店鋪【羊記雜貨鋪】
團購或定制請聯繫：020-83195715-805